ხშირად მოისმენთ ხელოსნებისგან, რომ აბაზანას და სველ წერტილებს არ სჭირდება ჰიდროიზოლაცია, რადგან წებოცემენტი და კაფელის/მეტლახის ფილები წყალს ისედაც არ გაატარებს. გარანტიასაც კი იძლევიან და ამ „ზედმეტი ხარჯის“ თავიდან აცილების რჩევასაც მოგცემენ. რა თქმა უნდა, ასე არ არის.
ელეგანტური დიზიანი, მაღალი ხარისხის მოსაპირკეთებელი ფილები, სააბაზანო ავეჯი და სხვა საჭირო ატრიბუტები დიდი მოთმინებით და დაკვირვებით შერჩევას მოითხოვს. აბაზანა და სველი წერტილები ის ადგილია, სადაც დაშვებული შეცდომა გამოუსწორებელი შეიძლება გახდეს და მთელი რემონტის თავიდან გაკეთება მოგიწიოთ. შეცდომათა სიაში ჰიდროიზოლაციის ეტაპის გამოტოვება პირველ ადგილზეა.
აბაზანის ჰიდროიზოლაცია უპირობოდ გადამწყვეტ როლს ასრულებს თქვენი კომფორტული ცხოვრების უზრუნველყოფაში. ამ ბლოგპოსტში განვიხილავთ აბაზანის ჰიდროიზოლაციის მნიშვნელობას რემონტამდე და მოგცემთ რჩევებს, რისი გათვალისწინებაც აუცილებელია ჰიდროსაიზოლაციო სამუშაოების დროს.
ტენიანობის კონტროლი
აბაზანა, საშხაპე, სველი წერტილები ჩვენი სახლის ყველაზე ნოტიო ადგილებია. შესაბამისი ჰიდროიზოლაციის გარეშე ტენიანობა შეაღწევს კედლებში, ჭერსა და იატაკზე. ეს გამოიწვევს ობის წარმოქმნას, წყლის გაჟონვას და სტრუქტურულ პრობლემებსაც კი. ჰიდროიზოლაცია მოქმედებს როგორც ბარიერი, ხელს უშლის ტენის შეღწევას სამშენებლო მასალებში და იცავს თქვენს საცხოვრებელ გარემოს დაზიანებისგან.
მოპირკეთებული ზედაპირების სიცოცხლისუნარიანობის გაზრდა
აბაზანის რემონტის ხარჯი მთლიანი სარემონტო ბიუჯეტის 20-22%-ს შეადგენს, რაც ცოტა ნამდვილად არ არის. რუდუნებით შერჩეულ მოსაპირკეთებელ ფილებს დაცვა და მოფრთხილება სჭირდება. ტენიანობამ და ფილების ქვეშ წყლის გაჟონვამ შეიძლება მათი დაზიანება და ზედაპირიდან აყრა გამოიწვიოს. თქვენი გარემონტებული სივრცის ესთეტიურობა დაირღვევა და რემონტი თავიდან გექნებათ გასაკეთებელი, რაც დამატებით ხარჯებს უკავშირდება.
ჯანმრთელობა და უსაფრთხოება
ესთეტიკის შენარჩუნების გარდა, აბაზანაში ჰიდროიზოლაცია ხელს უწყობს სახლში ჯანმრთელი გარემოს შენარჩუნებას. მაღალი ტენიანობა არის ობის წარმოქმნის და სხვადასხვა ჭიის გამრავლებისთვის იდეალური პირობა. ეს კი ადამიანების ჯანმრთელობას და მთლიან საცხოვრებელ სივრცეს უქმნის საფრთხეს.
სტრუქტურული მთლიანობის შენარჩუნება
სველი წერტილების ჰიდროიზოლაციის გარეშე დაზღვეული არ ხართ წყლის შეღწევისა და გაჟონვისგან. წყალი აზიანებს სამშენებლო მასალებს და შესაძლოა სტრუქტურული ჩამოშლაც კი გამოიწვიოს. გარდა ამისა, შეიძლება ზიანი მიადგეთ თქვენს მეზობლებსაც. ეს დიდ უსიამოვნებასაც გამოიწვევს და ზიანის ანაზღაურებაც მოგიწევთ.
მაღალი ხარისხის ჰიდროსაიზოლაციო მასალები
არჩევანი მაღალი ხარისხის ჰიდროსაიზოლაციო მასალებზე გააკეთეთ. აქ ეკონომიის გაკეთებაზე ფიქრი არ ღირს. შეარჩიეთ მასალები, რომლებიც განკუთვნილია მაღალი ტენიანობის მქონე ადგილებისთვის და ზუსტად დაიცავით გამოყენების წესი.
შეთავაზებული მასალა: Kalmatron-E
მნიშვნელოვანია დაამუშაოთ მთელი სივრცე: კედლები, იატაკი, ჭერი. განსაკუთრებული ყურადღება მიაქციეთ ნაკერებს, გადაბმის ადგილებს და კუთხეებს – ეს ყველაზე მგრძნობიარე ადგილებია წყლის მიმართ. ნებსმიერი ხარვეზი თუ ბზარი ნალესში მეტ ყურადღებას და განსაკუთრებულად დამუშავებას მოითხოვს. ასეთი შემთხვევებისთვის შემავსებელი ჰიდროსაიზოლაციო მასალა გამოიყენება.
შეთავაზებული მასალა: Kalmatron-N
აბაზანების და სველი წერტილების ჰიდროიზოლაცია აუცილებელი პროცესია, რომელიც არ უნდა გამოტოვოთ. თავი დაიზღვიეთ წყლის გაჟონვასთან დაკავშირებული რისკებისგან, შეიქმენით ჯანსაღი საცხოვრებელი პირობები და იცხოვრეთ კომფორტულად. ჰიდროიზოლაცია ის გონივრული გადაწყვეტილებაა, რომელსაც გრძელვადიანი სარგებელი მოაქვს.